從唔話得到唔話得

中文, 有時好奇怪. 同一個詞語, 可以有兩個南轅北輾的解釋. 最經典的例子, 是「算數」.
例句X
女:「你話過同我結婚架喎, 算唔算數先?」
男:「算數, 梗算數啦!」
例句Y
女:「你話過同我結婚架喎?」
男:「算數把啦!」

還有一個, 是「唔話得」.
例句X
師奶:「呢個後生仔好小器, 唔話得架.」
例句Y
師奶:「呢個後生仔咁抵得諗, 真係唔話得.」

今天, 我要告訴你, 我軒爸, 是如何由一個唔話得的人, 變成一個唔話得的人.

(下文會出現大量「唔話得」, 為免語意含糊, 例句X和例句Y中的「唔話得」將分別以「X唔話得」和「Y唔話得」替代.)

Y唔話得的我:

我呢, 以前呢, 是一個Y唔話得的人. 表面口串串, 其實頗熱心. 做事總先考慮別人感受才做. 先旁人之憂而憂, 後旁人之樂而樂. ... 等等, 行文至此, 為免像市面上好些blogger(是的請對號入坐)般太自吹自擂, hard sell得太肉酸, 令大家嘔, 此段就此擱筆.

我咁為你設想, 幾Y唔話得!

既然hard sell自己好核突, 不如聽聽由細玩到大既大哥泰點講:「佢真係好Y唔話得架, 俾咗我地一班住雞寮大o既童黨好多娛樂. 燒衫, 淋屎, 試槍, 踢紙波, 搶底褲, 佢都係遊戲o既"核心"人物. 我地真係由細玩到佢大. 佢從來都唔哼一聲, 仲笑騎騎. 佢份人真係Y唔話得! 無咗佢, 我唔會成為一個咁有自信既人. 長大之後, 問佢借錢又永無失拖, 我惡少少, 佢仲話唔使還添. 咁Y唔話得o既人, 去邊度搵呀.」

X唔話得的我:

可是自從有了軒軒, 我由Y唔話得, 變成了X唔話得.

好奇怪, 有了一個小兒子, 人變得有點孤僻. 可能是友人都未當過父母, 好像失落了些話題, 跟他們難有共鳴. 又可能社會都看不起男人, 認為"男人不會湊仔", 所以自尊受損, 人家善意的意見, 都看成批評. 也可能護兒心切, 人家說軒軒壞話, 那怕只是一個沒修飾過的笑話, 都想淋佢屎. 你對軒軒說甚麼話逗他笑也可以, 但就是X唔話得!

誰得罪我, 我就誠心誠意咁詛咒佢!


要知道, 父母們的神經, 都是很易被觸動的. 也因為許久以前曾經發生過某件事(遲下再講), 算是讓我見識到這道理. 現在的我, 就有更深切體會了.

話說回來, 我究竟變得有幾X唔話得呢? 我們又來問問大哥泰, 看他怎說:「個條X樣, 正X街嚟架! 生咗個仔, 好X囂張. 我話等佢仔仔大個, 幫我走粉. 佢X味吖, 鬧X我喎! 講下笑啫, 使唔X使呀, 以前都係咁講架啦. X那星.....(下刪一百個中文字和五十個X字)」

「咪咁牢氣往, 你未答我問題喎, 咁佢即係有幾唔話得呢?」

大哥泰:「好X唔話得囉!」

...
(後記)
聽說, 因為我的詛咒, 大哥泰後來在澳門真的給人亂槍射死了.

哈, 抵X死!

(P.S. 學杜琪峰的厚顏說法:需然人物和背景同槍火及放逐有相似o既地方, 但此篇文章, 絕非槍火及放逐的延續篇或外傳.)