進軍荷里活

據說我爸爸個蘿柚, 係尖既, 近來發覺佢果然是名不虛傳. 佢終於按捺不住逢週末在家湊仔既生涯, 已經連續三星期向媽媽申請帶我出街玩. 今個星期天, 終於獲批啦!

去邊玩? 咪荷里活廣場囉! 唔係喎, 爸爸第一次帶我出街玩, 要講得型o的.

今日爸爸帶我進軍荷里活呀!

實在估唔到, 原來外面既太陽, 係咁曬o既. 一出門, 爸媽迅速為我撐起傘子. 豈料, 那傘子, 竟然是透光的. 討厭, 又話帶我探索世界, 矇起對眼, 點探呢? 你地唔識買把防UV架咩! 兩件蠢貨!

到了荷里活, 爸媽到戲院買戲飛. 言談間, 我發現原來呢兩條友打算晏晝賣甩我睇戲. 我無嬲佢地, 因為我對住佢兩個都有啲悶. 我都兩個月大, 係時候自立下啦.

然後我地去咗food court, 爸爸話就嚟食飯, 唔好食咁多野, 所以媽媽只買了一個套餐兩份食. 大家都知啦, 爸爸常滿口謊言, 咁既理由, 我當然唔會信. 望住佢兩個輪流食嗰兜細細既米線, 我覺得好寒酸, 好羞家. 爸爸仲食到笑騎騎, 連湯都「o雪」埋, 剩低o個兩條牙菜都唔放過. What a shame! 我請你食啦, 我都有幾千蚊利是o既.

等爸爸飲完湯, 掃完風, 「o葛」o左一聲之後, 我地就去咗育嬰室. 爸爸攞出一條唔知叫咩o既帶出嚟. 我唔知嗰條嘢叫咩, 佢兩公婆都唔知, 媽媽只係會話:「老公, 攞條咩帶出嚟吖.」不過, 我只知道佢地又想吊起我. 但係, 你兩個既然俾我出得嚟, 就俾我睇下哩個世界啦, 吊住我, 睇太陽咩, 你地又無防UV摭喎! 所以, 我大力反抗, 佢地就此作罷.

好啦, 最後一個節目啦, 就係買生日蛋糕俾細姨姨嘞, 我精心挑選咗一個好cute, 但又cute唔過我o既蛋糕. 入到去東海堂, 有個阿伯同個o靚妹喺道互相謾罵, 我第一次喺街上面見到人鬧交(屋企見過一次, 邊個同邊個鬧交就唔好提嘞!), 好exciting! 爸爸話阿伯鬧o靚妹, 佢都無睇過, 叫我快D睇戲啦, 所以我兩父子就搵個靚位觀戰. 阿伯夠惡, o靚妹夠潑, 果然好好睇, 仲有嘢學添. 唔怪得阿爸話讀萬卷書不知行萬里路, 阿爸對住我講仆街講咗咁多日我都唔明, 宜家有個real-life example學, 即明喎!

好了好了, 一個小BB, 實在捱不了外出那麼久. 所以, 我在荷里活短短逗留了一個鐘就翻屋企. 就像某些香港大導演, 速速在荷里活打個白鴿轉, 便夾著尾巴回家. 我回到了家, 當然也學他們一樣, 對著四面牆, 興奮地大嚷:「我成功進軍荷里活啦!」