今日擺滿月酒, 我當然係小主角啦. 爸爸話會有好多好多親戚喎, 我有啲驚驚.去到酒樓, 果然有好多好多人. 爸爸係咁塞我俾人抱, 咁我驚驚囉, 咪唯有詐死囉. 點知爸爸話:「乜軒軒咁乖, 訓覺喎, 唔喊喎.」 然後更起勁咁將我傳來傳去. 媽媽見我俾人抱來抱去, 緊張非常, 煞有介事咁攞出濕紙巾來, 替我清潔清潔. 睇嚟都係媽媽錫我多啲!
好多人都抱我, 好多人都話我好得意, 不過對我最有興趣既, 就係太女麻. 爸爸話, 太女麻就係爸爸個爸爸個媽媽囉. 咁複雜, 點明啫.
太女麻一見到我, 見我光著腳板, 就話爸爸, 做乜唔俾襪仔我著. 爸爸同我講, 佢咁大個孫都未俾女麻女麻話過, 佢唔開心呀. 哈哈! 睇嚟佢孻孫o既地位, 已經俾我呢粒曾孫孫取代嘞, yeah!
太女麻抱住我, 就唔肯放手, 不過佢抱得我好舒服. 爸爸話太女麻以前做健康院, 所以抱BB梗有一手. 佢以前係個tough girl嚟架, 退休之後仲擺地攤, 擺到七十幾歲添. 我爸爸三十歲已經成條大懶蟲咁啦!
開席啦! 一碟兩碟三碟四碟, 豬豬蝦蝦菇菇翅翅, 好美味喎, 不過都無我份! 到第五碟, 竟然係鮑鮑片片, 我就嘩的一聲, 喊咗出嚟. 我又要奶奶!
媽媽抱我入房餵奶奶, 未幾, 太女麻竟溜了過來, 又要幫手餵. 全場最老的, 吼著最小的吃奶, 如此有趣的鏡頭, 不少人都紛紛擁來看看. 又未幾, 我終於食完奶奶嘞, 太女麻依依不捨咁將我交出. 我想, 太女麻餵得咁好, 不如多啲嚟餵我啦. 不過太女麻而家住安老院, 唔方便成日出嚟.
軒 : 爸爸, 咁你帶我見搵太女麻吖.
爸 : 乖啦乖啦, 唔好扭計啦.
軒 : 見太女麻啫, 我都話你懶架啦! 大懶蟲大懶蟲大懶蟲.
軒 : 大－懶－蟲－
爸 : 呀? 軒軒做乜鬼喊到咁大聲呢?
No comments:
Post a Comment